TwitterFacebook

சுந்தர் சி மீது ரூ.50 லட்சம் மோசடி புகார் கொடுத்த ரஜினி தயாரிப்பாளர்

அரண்மனை வெற்றிப்படத்தை அடுத்து விஷால், ஹன்சிகா நடிக்கும் ‘ஆம்பள’ என்னும் படத்தை இயக்கி வரும் சுந்தர் சி மீது ரூ.50 லட்சம் மோசடி புகார் ஒன்று சென்னை காவல் நிலையத்தில் பதிவு செய்யப்பட்டுள்ளது.

ரஜினிகாந்த், லதா, விஜயகுமார் நடித்து கடந்த 1978ஆம் ஆண்டு ‘ஆயிரம் ஜென்மங்கள்’ என்ற படத்தை தயாரித்த தயாரிப்பாளர் முத்துராமன் என்பவர்தான் இந்த புகாரை பதிவு செய்துள்ளார். அவர் தனது புகாரில் தனது ‘ஆயிரம் ஜென்மங்கள்’ படத்தை ‘அரண்மனை’ என்ற பெயரில் ரீமேக் செய்வதற்காக தன்னிடம் அனுமதி வாங்கிய சுந்தர் சி தனக்கு ரூ.50 லட்சம் தருவதாக வாக்குறுதி அளித்ததாகவும் ஆனால் கொடுத்த வாக்குறுதியை காப்பாற்றாமல் ஏமாற்றிவிட்டதாகவும் கூறியுள்ளார்.

ஆயிரம் ஜென்மங்கள் படத்தை தெலுங்கு மற்றும் இந்தியில் தானே ரீமேக் செய்ய இருந்ததாகவும், சுந்தர் சி ரூ.50 லட்சம் தருவதாக சொன்ன வாக்குறுதியால் அந்த படத்தின் ரீமேக் ஐடியாவை தான் ரத்து செய்துவிட்டதாகவும் இதனால் தனக்கு அதிக பண நஷ்டம் ஆனதாகவும் அவர் தன்னுடைய புகாரில் தெரிவித்துள்ளார். இந்த புகார் விவகாரம் கோலிவுட்டை அதிர்ச்சிக்குள்ளாக்கியுள்ளது.